Wo Saya Daar Shajar Jo Mujh Say Door

Wo Saya Daar Shajar,

Jo Mujh Say Door 

Bohat Door Hay Mager Us Ki

Lateef Chao'on

Sajjal, Naram Chao'on Ki Tarah

Meray Wajood' 

Meri Shakhsiyat Per Chaii Hay

Wo Maa Ki Bahoon Ki Manind Meharbaa Shakhein

Jo Har Azaab Main Mujh Ko Samait Laiti Hain

Wo Ak Mushfiq Dareena Ki Dua Ki Tarah

Shareer Jhonkon Say Naram Patton Ki Naram Sar-Ghoshi

Kalaam Karnay Ka Lehja Mujhay Sekhati Hay

Wo Doston Ki Haseen Muskurahaton Ki Tarah 

Shafaq Azaar, Dhanak Pairhan Shagofay Jo

Mujhay Zameen Say Mohabbat Ka Dars Detay Hain !

Udasiyon Ki Kese Jan-gadaaz Saa'at Main

Main Us Kay Shaakh Pay Sar Rakh Kay Jab Bhi Roii Hoon

Tu Meri Palkon Nay Mehsoos Kar Liya Foran

Bohat Hi Naram See Ak Pankhari Ka Sherree Lams !

( nami thi aankh main lakin main muskuraii hoon! )

Kari Hay Dhoop

Tu Phir Barg Barg Hay Shabnam

Tapay Hoon Lehjay 

Tu Phir Phool Phool Hay Resham 

Haray Hon Zakham

Tu Sab Konpalon Ka Ras Marham !

Wo Ak Khushboo 

Jo Meray Wajood Kay Andar

Sadaqaton Ki Tarah Zeena Zeena Utri Hay

Kiran Kiran Meri Socho Main Jagmagati Hay

( muhay qabool, keh wajdaan nahi yeh chaand mera

yeh roshni mujhay adraak day rahi hai mager ! )

Wo Ak Jhonka

Jo Us Shaher -e- Gul Say Aaya Tha

Ab Us Kay Saath Bohat Dorr Ja Chuki Hoon Main 

Main Ak Nanni See Bachi Hoon Or Khamoshi Say 

Bas Us Ki Ungliyaa Thamay Or Aankhay Band Kiye

Jaha Jaha Liye Jata Hay, Ja Rahi Hoon Main !

Wo Saya Dar Shajar

Jo Din Main Meray Liye Maa Ka Naram Aanchal Hay

Wo Raat Main Meray Aangan Pay Theharnay Wala

Shafeeq, Naram Zabaa Meharbaa Baadal Hay

Meray Dareechoon Main Jab Chaandni Nahi Aati

Jo Be-Charag Koii Shab Utarnay Lagti Hay

To Meri Aankhay Kiran Kay Shajar Ko Sochti Hain

Dabeez Parday, Nigahon Say Hatnay Lagtay Hain

Hazar Chaand, Sar -e- Shaakh Gul Ubhartay Hain !